Lásságámmi “luonddus lea iežas vuoidna dat hupmá iežas giela gulan dan guldalan ...” Eanni, eannážan Lásságámmi lei namma manin Nils-Aslak Valkeapää ieš gohčodii viesu man son huksehii dan viessosadjái man lei ožžon skeaŋkan 50-jagibeaivái Omasvuona gielddas. Viessosadji lea lássá alde, ja dan dihtii lea ge das Lásságámmi namman. Lásságámmi lea maid dan vuođđudusa namma mii hálddaša su vuoigŋadujiid vuoigatvuođaid. Vuođđudus ásahuvvui 2004 ja Norgga Sámediggi, Omasvona gielda, Romssa fylkkasuohkan ja Romssa Universitehta oamastit dan ovttas. Vuođđudusa ulbmilparagráfas čuožžu ahte dat galgá hálddašit Nils-Aslak Valkeapää árbbi dan vuoiŋŋa ja filosofiija mielde mii boahtá ovdan su bargguin ja almmustusain. Go Nils-Aslak Valkeapää jámii, de juolludii Romssa fylkkasuohkan ja Norgga Kulturdepartementa ruđaid nu ahte aiddoásahuvvon vuođđudus sáhtii oastit Lásságámmi, ja álggahit barggu dahkat dan dutki- ja dáiddárviessun. Vuođđudus hálddaša Valkeapää dáiddalaš buvttadeami vuoigatvuođaid. Vuođđudus bovde olbmuid sáddet ohcamuša beassat orrut Áillohačča viesus ja bargat iežaset dáidagiin ja dutkamušaiguin. Dáinna lágiin háliida movttidahttit ássiid joatkit fágalaš ja dáiddalaš ovdáneami. Viessu lea eanet uhcit aiddo nu mo Áillohaš guđii dan. Sierra lávdegoddi man vuođđudusa stivra nammada, vállje geat besset orrut viesus oanehat dahje guhkebuš áiggi. Dáid áigodagaid gaskkas lea vuođđudusa áigumuš doallat viesu rabasin vissis áiggiid nu ahte olbmot besset fitnat doppe.