Organisašuvdnaolmmoš, goasttideaddji ja movttiidahtti

Áillohaš lei guovddážis fuolaheamen ahte sámi dáiddárat galge organiseret iežaset. Son lei njunnožis ásaheamen Sámi girječálliid searvvi ja Sámi dáiddáriid searvvi. Ovtta gaskka son lei Álgoálbmogiid máilbmeráđi kulturkoordináhtor, ja dan olis áŋgirušai lágidit álgoálbmotkulturfestivála, Davvi Šuvva 1979:s. Áillohaš lei álo sámi dáiddalašvuođa ozus, ja árvvosmahtii máŋgasa duostat juoigat almmolaččat. Son movttidahtii olbmuid čállit sámegillii ja lei doaimmaheaddjin olu girjjiide.

(Harald Gaski 2014)